Hlan liopi ah a dingfel ngaimi ngakchia pate a rak um.
Nikhat cu a king i, vur nih a khuhmi khuate um kha aa tuar ti lo. A umnak khaan thlalangawng in vur nih a tuammi
tupi pakhat kha a hei cuan.
Tupi chung ah khuasik thla i a par tawnmi pangpar pawl an
par lai i an hmui tuk lai. Atu caan hi ngaknu thiang Mary nih Vanbawi Fapa
Messiah a hrin thla a si. Bethlehem khua
lei ah va kal in ka violin_te he nau no
Jesuh Khrih kha hla va sakpiak ning law va awi ning tiah a ruat. Cutin an inn i
a chungle pawl an i hngilh tiang a hngak.
A chungle an i hngilh dih hnu ahkhin a violin_te cu aa laak i
a zaktang ah aa ceh, cun thlalangawng khar kha a hun i lam cung ah a zuang. Za
lampi cu king ringriang te khin. Nemte’n a hrang siarmarmi zilthli kik sin vur
zong a thap tete khin an tla.
Angaite tiah cun, Khrih a chuahnak hmun cu khoika dah a si i
zeitindah kal a si ti a hngal lo. A hoihnak lei paoh ah a kal i a dai ngaimi
pangpar dum pakhat a phan. Cu pangpar dum chung ah a ummi ṭhutnak cung ahkhin
nungak muisam keng in sermi lung milem te khi a rak um. Kik nih a tlaihnak ah a
kirh in a kirhmi a kut tete nih khin medalin timi tingtang phun khat khi a rak
i tlaih. Mah cu thing milem nungak nute nih cun, “Zei na ti lai?” tiah a hal.
“Khrih chuahnak lei ah kal in ka violin te he ka va bia lai,” tiah tlangval
pate nih cun a ti. Nungak nute nih, “Cuti si cun, kei zong kan zul ve lai” tiah
a ti i, vur par nih a tlakmi a hni cu a hun khawn hnu ah, a ṭhutnak in a von ṭum.
Cuticun an pahnih tein Khrih chuahnak
lei panh dingin an i thawh.
Lam hlat nawnpi tiang khi an kal cang. Tlangval pate cu a
thin a phang zuahmah. A kut thei tete le
a kedong tete kha an hung kik vima. Fim kirker tein a biang cung ah a lungmi a
mitthli dor pahnih cu tikhal ko khi an hluan.
“Ṭap hlah mu… kal kan i timhnak hmun cu kan pha te ko lai,” tiah lung
milem nungak nute nih cun a hnemh. Nungak nute zong nih cun kal an i timhnak
lam cu a hngal ve hlei lo. Nungak nute nih cun a medalin cu a tum i, ngakchia
pate cu hnemh aa zuam. Cutin an khual lam cu an peh ṭhan i, lampi
ah a cer in a cermi angki fualpi aa hrukmi pa khi an ton. An chawnh len nain
zei bia hmanh a let hna lo. Cu pa cu a khuaruahmi nih amah pilawng mirh zuai
khin a tuah. An pawng i thingnge cung ah
khin khuasik ngai in kik nih a rak hlawm dengmangmi vate pakhat khi an hmuh.
“Vate, kan sin ah rak kan zul ve ca! Bawhte a simi Khrih Jesuh chuahnak
ah kal in zaihla sa in kan va bia lai.” Vate nih cun, “A ṭha ko. Keimah
telawng um cu a nuam lo, in zul ve hna ning…” tiah a ti i a zulh ve hna. Cutin
a kik i muihnak nih a zualmi zalampi cu an hei zul thliahmah. Khuai bantukin a
chawk letmi minung an tonmi pawl nih mi zei an si kha an hngal hna lo. Medalin
tingtang aa kenmi lung milem ngaknu an hmuh hmanh ah khuaruah har dawh an si lo.
An kal niahmah ko i, khua leng ah an hung pha. Khoika kalnak
zong an hngal ti lo. An mit nih a hmuh khawhmi a donghnak ahkhin vankuai lawng
aa suang. Cu zan ahcun arfi tete zong ceu dildel khin an ṭhep delhmalh.
An pathum te cun an kal thliahmah ko i meng tampi an lonh
cang. An umnak hmun in lungcheh can hrawng a hlatnak ahkhin thlam fate pakhat
khi an hmuh i lawmhnak in an khat. Cu thlamte cu capawl khin a rak i sami a si.
Mei-inn ceu nih thlam awng ah a run kahmi ceunak khi hmuh khawh a si. Khacer pakhat a awnh thawng zong khi an theih.
Thlalangawng khin an hei bih i mei-inn le meilul a rak i vaang. Thlam chung an
luh hnu ah an hmuh mi nih an khuaruah a harter hna.
Ngaknu Thiang Mary nih naute Jesuh aa pombu in a rak don
hna. Ngakchia pate le lung milem ngaknu te nih an khup i bil zau in hringhniang
semmawng te cu upatnak an pek. Vate zong nih cun a lu a khunpiak ve. Phanh an
duh i an fuhmi hmun cu a hnu bik ah an phan taktak.
Lung milem nungak nute nih cun a medalin hri cu a hun
siamremh. Ngakchia pate nih a violin cu a liang cung ah a hun chuan ve. Vate
nih a thlum tukmi a awzai dawh in hla cu a von sak. An pathum in lungtho le
thanuam te’n an sakmi nau-awih hla nih cun vancung tiang khin a tlirh. Fidi run
pawl tiang khin an mitthli a tla.
An hlasak a dih cun vawleicung khuaza ramkip in darkhing tum
thawng khing riangmang in an hung thang ziahmah. Christmas thingkung pawl an
hung keu . Vawleipumpi zong nih “A dai zan… a thiang zan…” timi hla kha an sa. An hlasak a dih in, anmah pathum nih cun
Messiah biaknak ah meilul cu an hun vaan cio. Cuhnu ah inn lei ah an kir ṭhan.
Lung milem ngaknu te cu pangpar dum i a ṭhutnak ah a vung
kai ṭhan. Vate zong aa hngilhmi thingnge kar ah a lut ṭhan. Ngakchia pate cu sunghno a nu ṭangnem cung ah
dai ziar in aa thlim ṭhan ve.
A thaizing cu fingrei cat in khua a hung dei. Ngakchia pate
nih cun Christmas thingkung tang ah tuanphung panga aa ṭialnak cabawm te khi a
hmuh. Cu tuanphung pawl cu a theih bal rih lomi an si caah a nuam tuk ti a si.
#Ch: Vawleicung Minthang Tuanphung Pawl Vol.2 by Thit Sar Ni kha aa
remtlak ning in lehmi a si.
* Photo credit: Pinterest
